يا رب … نؤمن بك إيمانا قاطعاً لا نصف إيمان

الله معكن … البعد جفا … معوّدين أنا وإنتو نبلٌش أسابيعنا وأيامنا سوا ، ورح نضلّ نستقبلا سوا … بالكتابة وع الهوا … الهوا وين …ما كان مليان هالكون … ما حدا بيقطع الهوا … والكون واسع والدنيا فاتحة إيديا … وأنا وإنتو ما بحياتنا عبّينا هوا … نحنا عطينا روح وقيمة ونكهة للهوا اللي بيشبه بعضو … محبّتكن ودعمكن وكلماتكن هنّي الهوا … وأنا حالياً عم بتنفّسُن ومن هلّأ لنرجع نلتقي بتمنّى صباحاتكن تبقى حاملة الضو والفرح والأمان …

يا ربّ ، بارك صباحنا وخفّف أعباء هاليوم وسهّل من صعابو … يا رب ، المسؤوليات الكبيرة اللي منحملا ومنمشي"هالحِمل الكبير " اللي مرافقنا بكل يوم منوضعوا أمامك … هالأعباء هالخوف هالغضب هالاحزان هالذكريات المرّة هالأوجاع … كل يللي واقف بطريقنا منسلّمك ياه …يا رب ، ساعدنا ناخد القرارات اللي بتريّحنا … أحياناً الوقوف على حفّة هالعمر بدون قرار كبير بزيد الهمّ وبيجعل من العمر أيام فارغة وانتظار للآتي اللي منقدر نصنعوا "أول ما نحسّك هون هالقد قريب ناطرنا ناخد الخطوة الأولى حتى تبارك وتزيد …". يا رب ، اسمح لكل يللي في مصلحتنا أن يدخل حياتنا انّونلتقي في ع دروبنا … وسكّر البواب ع كل يلّلي يتسلّل إلى حياتنا ليوجّع ويزعج ويعرقل مسار اللي كتبتو إلنا … خلّينا يا رب ، كل يوم نشوف إيدك عم تفتح بواب تبارك الخير وتزيدو … وتدمّر الشرّ وتعلّم أصحابا دروس إنك هون تُعطي فُرَص لكلّ أبنائك بالتساوي … لكن لما بحين وقت الحساب "تُحاسب كل واحد منًا بحسب نواياه وأفعاله " فيسقط الباطل والشر في شّر أعماله … يا رب … نؤمن بك إيمانا قاطعاً لا نصف إيمان …ومع ذلك كلٌ يوم منطلب انو نشوفك ونحسّك ونسمعك … يمكن لأننا ضعاف … يمكن لأنو بزمن رديء مليان وبشاعة وأحقاد وغيرة وتسلّط وحروب …الحاجة إلك أكبر والبشاعة بتجرّبنا ، وتفرجينا أنها الطريق الأسهل للسلطة للمال للراحة للأمجاد الباطلة … وحضورك بهالزمن حاجة … لتنقّي وتصلّح وتزرع البركات مطرح ما القلوب صافية والضمائر مرتاحة …

 يا رب قلوبنا عقولنا ضمائرنا وبيوتنا تطلب بركاتك … اشفِ الأمراض. خفّف الأوجاع ، صحّي الضمائر ، ورافق كل مشاوير هالعمر وليكن هذا اليوم بكل تفاصيلو وأحداثو ومفاجأتو وتجاربو عم تزيدنا قوة وإيمان وخير وحب … آمين